| GÓP-fréttir Ferðatorg Ferðaskrá Vaðatal |
Eyjafjallajökull Næstum
því !! |
| Merkis veður |
Mikil veðurhæð hafði verið á landinu öllu en var mun minni þennan morgun - alveg í samræmi við spár. Þær höfðu þó einnig spáð að heldur létti til á Suður- og Suðvestulandi en það fór ekki alveg eftir. Austur allar sveitir var fremur dimmt til lofts og frá Hvolsvelli sást einungis í fjallranann þar sem Seljalandsfoss unir í sínu frjálsa falli. Veðurspárnar höfðu lofað betra veðri síðdegis svo að við vorum seint á ferð - á Hvolsvelli klukkan 13. |
| Frá Háamúla |
Við runnum inn Fljótshlíðina til Einars bónda í Háamúla - sem slóst í för með okkur því það fór ekki milli mála að héðan var allt annað að sjá til jökulsins. Strax var ákveðið að fara upp - því þar var aðeins birtu að sjá þótt toppurinn væri ekki alveg skír. |
| Yfirsýn til Eyja |
Við ókum fram um Dímon, yfir Markarfljót á
nýju brúnni, inn með Seljalandsfossi og Hamragörðum og þar upp
á Hamragarðaheiðina. Þarna er enginn snjór. Þegar komið er upp í heiðina opnast mikill og gróinn dalur. Héðan er frábært útsýni til Vestmannaeyja og hingað upp er unnt að aka öllum fjórdrifnum bílum - líka fólksbílum. Fyrir ofan verður vegurinn hins vegar grófari og ekki lengur fyrir sunnudagsbíltúrinn á sumardegi. |
| Snjó- leysi |
Þegar komið er upp fyrir slóða er landið afar grýtt og gróft og þá er mikil hjálp að því að finna snjó til að aka eftir. Snjórinn lét hins vegar á sér standa að þessu sinni. Við ókum niður í dalverpið frá hinum mikla urðarhálsi sem kemur frá jöklinum til suð-vesturs og frá hægri - suðri - upp eftir hálsinum. Enginn umtalsverður snjór varð til að flýta för okkar fyrr en komið var upp að hryggnum mikla sem liggur vestur frá jökulbungunni. |
| Hálka | Í snjóleysi þessa vetrar - og samt úrkomu og stundum töluverðum frostum - hefur jökullinn tekið heldur óaðlaðandi breytingum. Alls staðar er flughált hjarn og bílarnir taka að skríða undan halla þegar minnst vonum varir - nema þeir séu á nöglum - en þannig búnir voru aðeins tveir af okkar fimm. |
| Skemmti- legt viðfangsefni |
Það var góð æfing að fara upp þessa
urðarhálsa og kljást við hálkuna en þar sem við vorum á
ferð síðla á stuttum degi febrúarmánaðar var ákveðið að
láta gott heita í útjaðri sjálfrar jökulbungunnar þar sem
enginn gat fótað sig nema á negldum skófatnaði. Nú ókum við til baka og nýttum langa og stundum nokkuð bratta skafla í lægðum til að flyta för okkar niður. Að þessu sinni fylgdum við vestur-hryggnum og síðan melhálsinum sem þar tekur við. Neðan hans ókum við fram á sléttuna, fylgdum henni spölkorn niður eftir og lögðum svo leiðina niður af brún dalverpisins og á slóðina frá því fyrr um daginn. Allt eru þetta leiðir sem mikið hafa verið eknar áður í vetur. |
| Birtan entist |
Við vorum komin niður fyrir neðsta skaflinn um það bil sem degi brá og enn var ratljóst eftir að loft var komið í dekkin og klukkan 6:15. Nú var þó ekki lengur þörf að hafa áhyggjur því GPS-tækin geymdu slóðirnar og vegurinn var snjólaus. |
| Auðar sveitir |
Enginn snjór er sunnanlands fyrr en komið er í 150 - 200 metra hæð yfir sjó. Vegir eru alauðir og þótt frost geti verið umtalsvert voru hvergi hálkublettir þennan daginn. Þetta var skemmtileg ferð og gaman að kljást við Eyjafjallajökul í þessu frábæra veðri - þótt ekki nytum sólar. Ritari þakkar ferðafélögunum ánægjulega samfylgd. |
Efst á þessa síðu * Ferðatorgið * GÓP-fréttir-fréttir * Ferðaskrá * Vaðatal