Aftur er haldið í hálendisferð

Texti: GÓP
Lag: Ralph Siegel
Eurovision 1982 - Ein bisschen Frieden úr Eurovision

Aftur er haldið í hálendisferð
haldið frá þysi og rafljósamergð
- hlýju og ást þó í brjósti þú berð
en borgin er svona gerð - .

Áhyggjur margar þar eftir ég skil
og ekki er hugsað um leik eða spil
- ólga í brjósti - í allt er ég til
og ærlegan hríðarbyl - .

Já! burt frá streði og burt frá streitu,
já, burt frá hugar og hjartaþreytu,
já, burt frá ysi og húsi heitu:
við höldum burtu úr bæ og sveit.

Við fögnum hæðum, við fögnum heiðum,
við fögnum óbyggðaslóð og leiðum,
við fögnum síðdegishimni heiðum
og förum hlemmi- og sanda skeið.

Næturmáni birtu ber:
Breði hvítur heilsar mér!
Joldusteinn! og Jökulsker! -
- ég er aftur kominn hér!

Hálendið laðar og lokkar í senn
leggur sinn galdur á dýr og á menn -
býður fram ógnir og unaðinn enn
- ef ég ei undan renn -

og hvort sem ég ái við læk eða lind,
leiðina geng - eða ek upp á tind,
farangri hleð eða bagga minn bind
blikar mín Íslandsmynd:

Hér á ég friðinn og fossaniðinn
og fuglakliðinn og vindinn iðinn
og ljósasmiðinn sem lífgar viðinn
og lætur griðinn í brjóstið inn - ,

og dagsins góma í litaljómann
og litla blómið og jöklasómann
og sumar-óminn og ísadrómann
í einihljómandi helgidóm.

Öræfanna andi er
allt um kring og yfir mér -
heim í sátt ég síðan fer:
- seinna kem ég aftur hér!