Ljósmyndir
ókomnar.

Haustferð 2000

Nýidalur - Jökulheimar - Veiðivötn - Hófsvað
Landmannalaugar - Dyngjuleið -
Dómadalur - Krakatindsleið - Emstrur

20. - 22. október 2000

Markmið þessarar ferðar var sem allra annarra ferða - að endurnýja kynnin við fjöll og firnindi, fara gamlar og nýjar slóðir, heilsa óvæntum uppákomum og undirbúa sig undir hið ókomna.

Þess utan var það sérlegt markmið að láta GPS-tækin lesa inn þéttriðnar punktalínur eftir öllum eknum vegum. Það nefnum við að FERLA leiðirnar. Þess vegna skiptist hópurinn á sumum vegamótum til að ferla báðar - eða allar leiðirnar sem unnið var að.

Ekið
í
Nýjadal

Bessi og Sigrún, GÓP og Freyja, Birgir og Jóhanna Erla og þeir Ólafur og Grettir fóru af stað um klukkan 19 og höfðu samflot frá Hrauneyjum.

Pétur lagði síðastur af stað um kl. 21 með Aðalbjörgu Eir, Lilju Hlín og Þóri Pétur - að henni Perlu ógleymdri. Hún er best uppalda tík sem ritari hefur kynnst - en ritari er heldur lítill hundaaðdáandi.

Skálinn í Nýjadal er aðlaðandi og rúmgóður en það tekur tímann sinn að hita hann upp. Sjálfsagt hafa fleiri en ritari átt kaldsama nótt en svefnpokar eru þó með ýmsum göldrum og ugglaust hitaheldari gamla gæsadúninum. Vísast hefði skálinn verið orðinn viðunandi næsta kvöld - en við vorum uppi klukkan 06:30 og farin af stað kl. 08.

Það var því strax ljóst að á miðhálendinu var þetta vetrarferð en ekki haustferð og gerðar voru viðeigandi ráðstafanir.

Þegar komið er út úr hrauninu er ekið að gígnum Mána sem er eins og hálft hringleikahús. Hálfur gígbarmurinn er móti norðri en leikvangurinn á hörðu steingólfi framan við þessi stúkusæti. Vegurinn beygir síðan milli Mána og gígsins Gutta sem heitir í höfuðið á jarðfræðingnum Guttormi Sigbjarnarsyni.

Það fylgir af þessari nafngift að þegar litið er af Lýsingi suður yfir Buxana er einn næstur og heitir að sjálfsögðu Næstbuxi. Annar er litlu fjær og heitir Nærbuxi. Svo fá þeir forskeyti allt sem hentar og sá stærsti er Stóri Buxi og þeir fjölmörgu sem eru lengra til suðurs nefnast einu nafni Suðurbuxar. Hugmyndaflug ferðamanna getur svo hverju sinni ort inn í þetta stef.

Auðvitað er fróðlegt ef einhver þekkir eldra nafn á þessum gígum og er það afar velkomið í línu til ritara.

Það er ekki í kot vísað að dvelja í Jökulheimum. Skjótlega voru húsin funheit og okkur leið vel við snæðing og létt spjall. Efldist og mjög kátína manna þegar ritari sagði af umtalsverðri villu sem hann rataði í fyrr þennan sama dag og rannsakaði norðurbakka Kvíslaveituskurðarins milli brúnna. Er hann nú orðinn þokkalega kunnugur því svæði. Spennandi þótti mönnum frásögn þeirra Grettis, Ólafs og Birgis af ævintýri þeirra er þeir voru með í þeim hópi sem undirbjó og sigldi niður Dimmugljúfur - og buðu þeir að lána okkur hinum myndbandsspólu með upptöku af þessu magnaða fyrirtæki.

Förum upp með fasið þýtt
fyrndum draumum gleymum
allt er nú sem orðið nýtt
inní Jökulheimum.

Birgir og Jóhanna Erla og þeir Ólafur og Grettir fóru saman.
Birgir segir: Við fórum austur með línunni út að á en þar er ca. 90 gráðu hægri beygja. Síðan framhjá Ljótapolli sem leið liggur að krossgötunum. Þaðan fórum við austan Tjörvafells beint inn á Dómadalsleið og í Landmannahelli. Svo áfram vestur eftir matarstopp. Við tókum sem sagt krókinn inn í Landmannahelli og því vantar kafla af eiginlegri Dómadalsleið.

Svartikrókur
Sjá hér mjög skemmtilega mynd af þessum stað - og fleiri myndir í annarri frásögn.

Sverrir og Kristinn og þeir Stefán og Guðmundur héldu að Frostastaðavatni.
Sverrir segir:
Frá Hófsvaði fórum við suður með fljótinu að Ljótapolli, þaðan að Landmannahelli og ferluðum hringinn í Kringlunni. Þá ókum við upp á Pokahrygg og ætluðum suður um Mógilshöfða, en snérum frá vegna lélegs skyggnis og vegna þess að framundan var hliðarhallabrekka með blautum og afar sleipum snjó.
Við afréðum þá að fara næstu leið fyrir vestan, um Krakatind, Mundafellsháls og Vatnafjöll suður á Fjallabaksleið syðri að Keldum. Það gékk ágætlega, en snjórinn í Nýjahrauni var þó nægur til þess, að ekki tókst alltaf að halda slóðinni, en samt að langmestu leyti. Við Hófsvað hafði ég fært Veiðivatnaferilinn yfir á gömlu 386 fartölvuna, en láðist að tæma GPS-tækið, svo ég vissi ekki hvenær að því kæmi, að ferillinn frá Hófsvaði færi að étast upp. Það kom svo í ljós að hann nær aðeins frá Dómadalshrauni og suður á Fjallabaksleið, en þeir ferðafélagar okkar, sem urðu samferða að Landmannahelli, eiga vonandi báðir það sem á vantar.

Bessi og Sigrún óku leiðina sem áður hét Yfir Dyngjurnar
Bessi segir: Austast er ekið norðan undir Eskihlið, litlu síðar blasir Löðmundur við í suðri en vestast á leiðinni er ekið undir Dyngjum þeim sem leiðin er kennd við. Við Valafell má fara hvort heldur norðan þess eða til suðurs á Dómadalsleið. Í síðara tilvikinu er ekið meðfram Valagjá sem er vel þess virði að skoða, þrír aflangir sprengigígar, samvaxnir. Afar greiðfær enda nánast ekkert farin í seinni tíð, þess vegna ekkert þvottabretti!

Ritari og Freyja og Pétur og hans börn héldu í Hrauneyjar.

Þetta var skemmtileg ferð með hóflegri vetrarsveiflu. Verulegur munur var á snjóum og færi efra og neðra á öræfunum. Aðeins föl var sunnan Köldukvíslar og Gjáfjalla og nærri Veiðivötnum var víða engan snjó að sjá á stórum svæðum. Þar var sums staðar líkt og komið hefðu snjósveipir og markað sér hluta í hlíðum og fjöllum - með nettum hætti.

Ritari setur inn nánari lýsingu á verði forritsins og hvar það má finna á vefnum - þegar Bessi hefur rekið augun í þessa setningu ">og sent honum upplýsingarnar.

Það reynast ekki drápsklyfjar á aðstoðarmanninn að hafa tölvuna á hnjánum - eins og maður þó hefði haldið að óreyndu, en auðvitað er töf að því að þurfa sífellt að leggja hana frá sér þegar hlaupa þarf út til framkvæmda. Mjög er nytsamt að útbúa hnappaborðshlíf svo leggja megi þar á hendur sínar og það smálegt sem verið er að nota.

Enn betra er auðvitað að hafa heppilega festingu til að bera tölvuna og halda henni þannig að báðir geti litið á hana eftir þörfum. Þá þarf hún að hafa snúnings-sæti. Það þarf að vera öflugt til að halda henni kyrri. Því miður þekkir ritari enn ekki til neins aðila sem útbýr slíkar festingar.

Ath!!
GPS-síða Grétars er
öflugasta
GPS-torgið
sem ritari
hefur
fundið á
vefnum.
Líttu þangað!!

Á GPS-síðu Grétars eru umsagnir um forritin. Við fyrirspurn frá ritara sendi Grétar þetta svar:
Gartrip forritið er að mínu mati mjög gott til að vinna með punktasöfn, en það er ekki "moving map" forrit, þ.e. les ekki jafn óðum inn á kort í tölvunni, eins og Navtrek t.d. gerir. Ozi hef ég ekkert notað, rétt fiktað með það, en líst nokkuð vel á það, vandinn með flest "moving map" forrit er að fá kort, nema að fara að skanna sjálfur einhver ósköp af kortum.