Magnús Ásgeirsson
byggingameistari, ferðamaður og þúsundþjalasmiður
f. 19. apríl 1947 - d. 24. mars 2013

Forsíða
http://www.gopfrettir.net/open/MagnusAsgeirsson

Í ferðum um öræfi Íslands á sumri og vetri kemur margt óvænt upp við erfiðari kringumstæður en flestir eru vanir. Við slíkar aðstæður er gott að hafa einvalalið til hvers sem er. Gegntrausta verklagna einstaklinga með fjölþætta reynslu sem grípa strax til aðgerða og eru svo samhuga að úrlausnaráætlun sprettur næstum þegjandi fram. Hver er á sínum stað og veit að um leið er haft auga með hvort og hvar frekara lið má leggja. Með þannig félögum er frábært að ferðast og erfið veður og torsótt færð verða grípandi sameiginleg viðfangsefni og lausn þeirra sameiginlegur sigur og gleði allra. Í okkar fámenna hópi er nú skarð fyrir skildi þegar hann er fjarri. 

Ferðir okkar eru farnar á vit nýrrar upplifunar, nýs ævintýris. Við söfnum endurminningum um samstarf og lausnir, um bálviðri og blíðviðri, harðan tjaldbotn og fjallaskála. Um fornar slóðir og nýjar leiðir, ofan í ófær hraun og upp á sjónvíða fjallatinda, um aftaka bylji og um logn og blíðu á jökultoppum.  Um eftirminnilega daga. Hverja ferð endurförum við aftur og aftur í huganum - íklædd atgerfi hennar, félagatengslunum og ómi landslags og lífsljóði þess ævintýris. 

Þegar félagi fellur frá rifjast upp sú margfalda sameiginlega gleði sem við áttum saman og um hugann fara hlýjar þakkir fyrir frábæra samfylgd.

Gíslavinir senda Möggu innilegar samúðarkveðjur og þakkir fyrir samfylgdir og ómetanlegt samstarf og hjálp þeirra Magga sem sum okkar hafa notið í áratugi en önnur allt frá hans æskuárum.

Í apríl 2013 - Gísli Ólafur Pétursson                         

Reykjanes - Krísuvík

Reykjanes - Krísuvík - á Skriðu austan Heiðnabergs

Sumarskreppa um Norð-Austurland

Sumarskreppa um Norð-Austurland - við Breiðamerkurlón

Þórsmörk og Tindfjöll

Þórsmörk og Tindfjöll - við Tindfjallasel sem var neðsti Tindfjallaskálinn
en hefur nú verið rifinn og annar byggður skammt frá

Þingvöllur og Skjaldbreiðarleið upp frá Tintron

Þingvöllur og Skjaldbreiðarleið upp frá Tintron

Sumarskreppa um Vestfirði

Sumarskreppa um Vestfirði - í flugminjasafninu á Hnjóti

Hofsjökulshringur

Hofsjökulshringur - á Hveravöllum

Norðausturhálendið til Kárahnjúka og heim um Siglufjörð

Norðausturhálendið til Kárahnjúka og heim um Siglufjörð
Við Lindaá í Hvannalindum norðan undir Kreppuhrygg 

Sumarskreppan 2005 - Nýidalur - Berufjörður

Sumarskreppan 2005 - Nýidalur - Berufjörður - Við Stóru-Laxá hjá Laxárdal

Sumarskreppan 2004 - Þakgil, Laki, Miklafell, Syðra Fjallabak

Sumarskreppan 2004 - Þakgil, Laki, Miklafell, Syðra Fjallabak - í Lakagígum

Við laugina í Laugafelli ............................ Í mý-vari í Laxárdal
 

Sumarskreppan 2003
Horft norður í Hvalvatnsfjörð - norður í Fjörður
Leiðin lá víða í þessari ferð: Nýidalur, Dyngjufjalladalur, Laxárdalur, Fjörður,
Laugafell, Ábær, Kerlingarfjöll, Háifoss

Dags-
skreppa
í
Tindfjöll

*

Heimsóttir
ábúendur
í
Miðdal

22. ágúst 2003 - við skála Fjallamanna, þann efsta í Tindfjöllum.

Á myndinni eru Maggi og Magga og þeir GÓP og Karl Th. Sæmundsson.
Karl var einn þeirra Fjallamanna sem hönnuðu og byggðu skálann í árdaga.
Alla páska fram á efri ár var hann hér efra á skíðum.
Karl lést ári síðar, í ágúst 2004 og til hans var þá gerð þessi vísa:

Sólin hún situr í hlíðum,
sindrar hin hvíta mjöll,
glaður þú skundar á skíðum
í skála við Tindafjöll.

Haustferð suður yfir Skaftá 17.-18. október 1992

Myndin er tekin þegar Þorsteinn Ólafsson ekur yfir syðri upptakaál Skaftár í innri Skaftárbotnum og við horfum í Fögru sem er það fjallið í Fögrufjöllum sem næst er jöklinum. Glöggt sér í malardyngjur sem jökullinn hefur hnoðað að rótum Fögru á þeim langtímum sem hann náði að Fögru en þeim tíma lauk um 1960. Þá hætti Skaftá að renna í Langasjó. Mikið af þessum malardyngjum er nú löngu borið burt í vatnagangi Skaftár á þeim árum sem liðin eru frá 1992.

Myndirnar eru fáar - en ferðarlýsingin er svona:
Á laugardegi lagt af stað eftir hádegi. Farið í Veiðivötn og svæðið skoðað. Tekin afleggjarinn frá Heimaskarði og ekið að Dór. Gengið að honum. Komið snemma í Jökulheima þar sem allir voru sofnaðir um kl. 22. Upp klukkan 05 og ekið af stað kl. 06. Ekið suður yfir Tungnaá og Skaftá og farin brautin gegnum hraunið frá Tröllhamri í Laka. Lakagígar skoðaðir nokkuð en haldið áfram og komið í bæinn fyrir miðnætti. Myndir tók Karl Theodór Sæmundsson.

Þann 28. ágúst höfðum við farið forferð til að kanna þessa stigu. Ekki eru myndir úr þeirri ferð því þess var ekki gætt að taka þær. Hins vegar er lýsing þeirrar ferðar nokkuð ágæt. Skoðaðu hana hér.